काठमाडौं, मंसिर २४ । आगामी निर्वाचनमा आउने मत परिणामको बारेमा सबैजसो पार्टीले आफ्नो मूल्यांकन थालिसकेका छन् । हिजोको निर्वाचनमा ठूलो पार्टी भएको कांग्रेसलाई पनि अहिले आएर भोलिको अवस्था के हुन्छ भन्ने डर भएको छ ।
नयाँ पार्टीको उदय भएसँगै उनीहरुले जनताको मन जितेकाले पुराना पार्टीलाई डर हुनु स्वभाविक पनि हो । उनीहरुले आफूसँग पुरानो जनमत भएकाले जुनसुकै निर्वाचन सजिलै जित्ने दाबी गर्दै आए पनि पछिल्लो घटनाक्रमले उनीहरुको सपनालाई तुहाइदिएको छ ।पार्टीले जनताको पक्षमा नयाँ कार्यक्रम दिन नसक्नु र नेता तथा कार्यकर्तालाई जागरुक बनाउन नसक्नु उनीहरुको ठूलो कमजोरी हो । यो गाउँमा र यो वडामा यति भोट छन् भनेर गणना गर्दै बसेका उनीहरुलाई पछिल्लो परिणामले कुनै पनि जनता आफ्नामात्र मतदाता हुने रहेछन् भन्ने सिकाएको छ तर पनि उनीहरुमा अझै पनि अरु कुराले छुन सकेको छैन । पुराना पार्टीले गरेका गलत कामको विषयमा जनता जानकार भएकाले पनि मानिसहरु विकल्प खोज्ने अवस्थामा पुगेका छन् ।
हिजोको दिनमा कांग्रेस र एमालेमात्र प्रमुख पार्टी थिए ती पार्टीमा मानिसहरु आइजाई गर्थे । एउटा पार्टी चित्त नब्ुझे अर्कोमा जाने र अर्को चित्त नबुझे अर्कोमा जाने चलन थियो । पछि माओवादीको जन्म भएपछि असन्तुष्टहरु सबैजसो माओवादीमा लागेका थिए । एकातिर पुराना पार्टीसँगको असन्तुष्टि र अर्कातिर अवसरको खोजीका लागि उनीहरुले नयाँ पार्टी रोज्नु स्वभाविक पनि थियो । माओवादीले पनि भन्ने एउटा र गर्ने अर्को गर्न थालेपछि माओवादीप्रति पनि मानिसको आस्था हराउँदै गएको छ । माओवादीले द्वन्द्वकालमा निम्त्याएको हत्या र हिंसाको श्रृखलाका कारण मानिसहरुमा माओवादीप्रतिको नकारात्मक छाप अझै हट्न सकेको छैन ।
यी तीनवटा पार्टीको विकल्पमा राप्रपा, राष्ट्रिय स्वतन्त्र पार्टी (रास्वपा) र विभिन्न ढंगले अभियान चलाउनेहरु आएका छन् । मानिसले अभियान चलाउनेलाई पनि राम्रो समर्थन गर्नु भनेको त्यो पनि दलप्रतिको असन्तुष्टिको एउटा राम्रो संकेत हो । जुनसकुै नयाँ पार्टीले पनि सुरुमा मानिसलाई प्रभाव पार्ने गरेका भए पनि पछि जनभावना अनुसार काम गर्न नसक्दा आलोचित हुनुपरेको छ ।
