एमालेका विद्या, कोही पाइरहने, कोही पाउँदै नपाउने
काठमाडौ, जेठ ९ं । नेकपा एमालेबाट विद्यादेवी भण्डारी दुई पटक राष्ट्रपति भइन् । एमाले अध्यक्ष केपी शर्मा ओलीले सहयोग गरेपछि उनलाई त्यो अवसर मिल्यो । पहिलो पटक राष्ट्रपति बनाउँदा पार्टीभित्र सर्वसम्मत निर्णय नै भएको थियो तर दोस्रो पटक उम्मेदवार बनाउँदा भनें ओलीले धेरै आलोचना खेप्नुपरेको थियो ।
भण्डारीले पटक पटक सांसद जितेर आफूलाई स्थापित गरेकी थिइन् । श्रीमान मदन भण्डारीको असामयिक मृत्युपछि राजनीतिमा सक्रिय रुपले आएकी भण्डारीले जीवनमा ठूलो उपलब्धि हासिल गरेकी छिन् । उनले आफ्ना श्रीमानको हत्यारा पत्ता लगाउने कुरामा चासो नदेखाएको भन्दै आलोचना पनि भएको छ । उनी यति लामो समय राष्ट्रपति हुँदा र एमाले पटक पटक सरकारमा जाँदा पनि त्यो विषय नउठाउनु भनेको अब त्यो कुरा सेलाएको नै होला भनेर अनुमान लगाउन सकिन्छ । भण्डारीले मन्त्री बन्ने मौका पनि पाएकी थिइन् । उता कास्की–२ बाट निर्वाचित एमालेकी सांसद विद्या भट्टराइले भनें दुई पटकसम्म निर्वाचन जित्दा पनि पार्टीले दिएको राम्रो अवसर पाएकी छैनन् ।

पार्टीले टिकट दियो त्यो पनि एउटा मुख्य कुरा नै हो तर पार्टी अध्यक्ष ओलीले उनलाई अरु अवसर भनें दिएका छैनन् । दुई पटकसम्म निर्वाचन जितेर जनताको मन जित्नेलाई पार्टीले पाउने भागबण्डामा केही दिएको भए ओलीकै उचाई थप बढ्ने थियो तर ओलीले यसतर्फ ध्यान दिन सकेनन् ।
श्रीमान रविन्द्र अधिकारीको अचानक निधन भएपछि त्यो क्षेत्रमा भएको उपनिर्वाचनमा विद्याले अघिल्लो संसदीय कार्यकालमा जितेकी थिइन् भनें यस पटक पनि जनताले फेरि पत्याए ।
ओलीले विद्यालाई न त मन्त्री नै बनाए, न त हिजो एमालेले पाएका कुनै पनि संसदीय समितिको सभापति नै बनाए । विद्यालाई पार्टीले बेवास्ता गरेको भनेर भन्न थालिएको छ । उनलाई हार्ने निश्चित भएको उपसभामुखको उम्मेदवार भनें बनाइएको थियो, त्यतिबेला कांग्रेसकी पुष्पा भुसालले उपसभामुख जितेकी थिइन् । संसदीय प्रक्रियामा सभामुख, उपसभामुख, मन्त्री, संसदीय समितको सभापति, प्रमुख सचेतक, सचेतकजस्ता पदलाई निकै अर्थपू्रर्ण रुपले हेर्ने गरिन्छ ।
ओली महिलालाई अवसर दिइरहेको भन्न पछि पर्दैनन् तर हार्ने ठाउँमा मात्रै प्रायः टिकट दिने गरिएको छ । उपराष्ट्रपतिमा हार्ने निश्चित भएपछि २०७९ साल चैत्र ३ गते भएको निर्वाचनमा एमालेले अष्ठलक्ष्मी शाक्यलाई उम्मेदवार बनाएको थियो, यतिबेला रामसहायप्रसाद यादवले निर्वाचन जिते । निर्वाचित सांसदलाई ओलीले सम्मान गर्न नसकेको र आफ्नो चाकडी चाप्लुसी गरेर बालकोट घुम्नेलाई मात्र अवसर दिने गरेको भनेर ओलीको आलोचना हुने गरेको छ ।

